МЕДИТАЦИЈА И КОНТРОЛА НА УМОТ

                                                 МЕДИТАЦИЈА И КОНТРОЛА НА УМОТ

Како и креативната Визуелизација, Медитацијата е основа за спознавање на духовните влијанија и тајните во Материјалниот свет, но истовремено е и основа за спознавање на повисоките духовни светови (Највисокиот свет - кој е изворна енергија на универзумот, Креативниот свет и Астралниот свет - кој се најдува одма над Материјалниот свет). За запознавање на овие светови, потребно е и соодветно ниво на свест кое се развива низ процесот на индивидуализација на свеста (Спиритуално ниво на свест кое е Највисоката свест или Бесконечната Божествена свест, Ментално ниво на свест или нивото на Умот, Емоционално ниво на свест и Материјално ниво на свест). Пошироки објаснувања за четирите Светови и четирите нивоа на Свест можат да се најдат во претходните постови од овој Блог.

       Сепак, овде нема да зборуваме за многубројните методи за медитација кои се користат за спознавање на духовните светови и нивото на свеста во тие светови бидејќи тоа е широка тема со која ќе се запознаеме при проучувањето на некои поедноставни но корисни медитативни методи кои се применуваат во разните системи на Јогата и Факиризмот.

       Овде поопширно ќе се запознаеме со практична примена на медитацијата за Контролата на Умот, со цел да ја прошириме нашата свест и да се научиме да ја пробудиме латентната моќ на умот. На медитативно ниво умот може да се вежба преку инструкции својствени за него (слики и мисли или зборови) и да го презема управувањето за постигнување на бескрајни можности на медијантот.

       Значи Моќта на контролата на умот врз телото, мислите, емоциите, концентрацијата, човековите активности, здравјето, решавањето на сложени проблеми и во многу други свери на човековите активности, е тесно поврзана со медитацијата (но и со визуелизацијата, со која веќе пошироко се запознавме).

 Веќе видовме дека Медитацијата се однесува на Нивото на Умот, односно навлегувањето во медитативна состојба се случува при смалени вибрации на мозокот (8 до 12 Hz) или Алфа ниво - кое намерно ги предизвикуваме, но ваквата состојба на нивото на умот се јавува и непосредно пред спиење или одма после будење. При потполно будна состојба во која ги извршуваме нашите секојдневни обврски, ние сме во Бета ниво (или на „надворешно свесно ниво’’), но со вежбање на Контролата на Умот можеме самоволно да навлеземе во Алфа ниво, а сепак да задржиме будна состојба и потполна присебност.

КАКО ДА МЕДИТИРАМЕ?

Медитацијата е првиот чекор за „Контрола на умот“.  Уште во самиот почеток чувствуваме пријатно смирување, а со продолжување на медитацијата навлегуваме се’ подлабоко во себе и не обзема посилно чувство на внатрешен мир и отсуство на грижи или лутина. Притоа чувствуваме и телесно опуштање поради неутрализацијата на активностите на умот кои го доведуваат нашето тело до нарушување на здравјето. Нашето тело е создадено да биде здраво и има сопствени механизми за излекување, но тие се блокирани од умот кој не е обучен да ги контролира. Во почетните вежби на медитација постои можност да ни се наметнат некои од чувствата и мислите кои не оптеретувале пред медитацијата, но нетреба да им даваме значење (за да не добијат моќ) бидејќи по краткотрајно вежбање тие нема повеќе да се јавуваат а медитацијата целосно ќе ги ослободи самоисцелувачките моќи на телото и ќе му ја врати енергијата која се трошела при нервната напнатост поради негативните влијанија на надворешната средина.

         Затоа најпрво ќе научиме како да медитираме и да постигнеме Ниво на Умот каде ќе почувствуваме внатрешен мир и опуштеност, а потоа ќе можеме да ја ослободиме својата имагинација (која ја објаснивме во претходниот пост за Креативна визуелизација) и да решаваме разни проблеми.

       Сега ќе разгледаме еден добар пример за медитација односно навлегување во медитативна состојба или Алфа ниво на свеста (според „Силва метод за контрола на умот“, кој е присутен во стотина земји во светот).

Наутро, после будењето и евентуална посета не купатилото, поново се враќаме во креветот (но за секој случај го навиваме и саатот да звони после 15 минути, за да не ни се случи да заспиеме при медитацијата). Ги затвораме очите, но свртени нагоре према очните капаци, под агол од околу 20 степени. Ваквата положба на очите ги снижува вибрациите на мозокот и почнуваме да навлегуваме во Алфа ниво на Умот. Притоа почнуваме и да одбројуваме наназад од 100 према 1, покроце, на секои две секунди. Додека броиме, мислиме на броењето и при крајот веќе ќе го достигнуваме потребното Алфа ниво односно нивото на медитација.

       Впечатоците од ова ниво на Умот се различни, во зависност од тоа кој колку го користел во секојдневниот живот (несвесно). Науто, одма после будењето, скоро сите (барем за момент) го доживуваат ова ниво пред да се расониме. Во текот на спиењето човекот најчесто поминува низ три нивоа: – Тета (при мирен сон кога мозочните вибрации се пониски од Алфа нивото), Бета ниво ( ниво на будна состојба или при сонување) и Алфа ниво кое е премин кон будното ниво (Бета) и во кое секој различно се задржува при утринските активности додека се расони. Оние кои подолго време се задржувале во Алфа ниво (без да се свесни) при медитацијата нема посебно да ги почуствуваат промените, но сепак треба да продолжат со вежбите за да можат свесно да ја користат медитативната состојба.

       За да го совладаме методот на брзо навлегување во медитативна состојба, потребно е неколкунеделно утринско вежбање, но со различно време поради смалување на одбројувањето по секои 10 дена. Првите десет дена се брои од 100 до 1, вторите 10 дена се брои од 50 до 1, понатаму од 25 до1, па од 10 до 1, и конечно последните десет дена се брои од 5 до 1. Значи, на крајот на вежбата веќе ќе можеме многу брзо да навлегуваме во медитативна состојба, иако и ова време можеме да го намалиме по подолготрајно користење, односно скоро моментално да навлегуваме во медитативна состојба според нашата желба или потреба.

       За излегување од Алфа нивото, се користи само еден метод -  ментално си ја задаваме следната инструкција:  „Додека бројам од 1 до 5, покроце ќе излезам од ова ниво, ќе бидам потполно буден и ќе се чувствувам многу попријатно. Еден – Два (се припремаш да ги отвориш очите), - Три (ги отвораш очите), - Четири – Пет, очите ми се отворени, потполно сум буден и се чувствувам многу пријатно.

       Значи воспоставуваме две рутински постапки – една за влез во Алфа ниво (медитативно ниво), а друга за излез од ова ниво. Но морам да напомнам дека немораме стрикно да се држиме до дадените инструкции ако создадеме свој начин за постигнување на целта. Ова е само еден пример кој дава добри резултати. Кога ќе научиме наутро да навлегуваме во медитативно ниво со броење од пет до еден, оваа метода ќе можеме да ја применуваме во било кое време во денот.

     Сега ќе изнесам уште две кратки додатни вежби: - Сместете се удобно на фотеља, столица или кревет. Покушајте да се сконцентрирате на еден дел на телото и ќе почуствувате пријатна топлина и опуштање. Истото тоа направете го со друг дел на телото ... за да би го свесно опуштиле. Почнете од левото стапало, па целата лева нога, преминете на десното стапало, и продолжете до лицето, очите ... и конечно до кожата на главата. Ќе бидете изненадени колку многу сте биле напнати пред изведувањето на оваа вежба. Јас многу често ја применувам оваа вежба но парцијално на делови кои сакам да ги опуштам (градите, стомакот, нозете кога ми се студени ...) и задоволен сум од постигнатите резултати.

Во втората вежба сконцентрирајте се во една точка на спротивниот зид (или на плафонот, ако лежите). Избраната точка треба да биде на околу 45 степени над равнината на погледот. Гледајте во точката додека ви затежат очните капаци, а потоа затворете ги очите и почнете да броите од 50 према 1. После десетина дена го намалуваме броењето – од 10 према 1, и во последната фаза, која понатаму ќе ја практикуваме како самостојна вежба – од 5 према 1. Овие две вежби можат да се практикуваат во било кој дел од денот.

       Сега се поставува прашањето – Што ќе правиме и за што ќе размислуваме кога ќе навлеземе во медитативна состојба или Алфа ниво?  - Тогаш почнуваме да вежбаме Визуелизација, која е основа за „Контрола на умот“ и со која пошироко се запознавме во претходниот пост.

Постојат и други методи за медитација – концентрирање на монотон звук како што е  ОМММ ..., ОННН ..., АМЕННН ... – искажан ментално или на глас;  потоа со пратење на сопственото длабоко дишење;  или пратење на ударите на тапанот (најчесто при ритуали). Сите овие методи ( и многу други кои се применуваат за подруга цел) доведуваат до смирено медитативно ниво на свеста, но опишаниот метод со броењето наназад има големи предности за вежбање на концентрацијата која е клуч на успехот кој сакаме да го постигнеме. Конценрацијата ни помага за решавање на многу практични проблеми, побрзо учење, подолго памтење и сл.

***

           Се’ што мислиме дека сме го заборавиле, поврзано е со некое случување кое сепак не сме го заборавиле туку не се сеќаваме на таа случка. Ако сме „заборавиле“ некое име, поим, формула, информација – случката е времето кога сме ги чуле или прочитале. Затоа, ако сакаме да се сетиме на нешто што мислиме дека сме го заборавиле, најпрво треба да влеземе во медитативна состојба, да визуелизираме преку менталниот екран (со што веќе порано се запознавме), преку визуелизацијата да се вратиме на изминатите околности во врска со случката за која мислиме дека сме ја заборавиле, и „заборавеното“ ќе се појави.

Така, проживувајќи ја ситуацијата во медитативна состојба, на овој начин можеме да ги „најдеме“ клучевите кои некаде сме ги заборавиле, да се сетиме на денот кога требаше да полагаме, да се сетиме (потсетиме) на некоја лекција која ни е зададена на испит, и сл.

         На сличен начин делуваат и рекламите кои ги гледаме на ТВ. Ги има толку многу што ние не ги запамтуваме, но во одредени околности (кога во продавница ќе видиме некој производ кој бил рекламиран), ние ќе се потсетиме на рекламата, иако не можеме да наброиме ни пет реклами кои ги гледаме на ТВ. На овој начин рекламите влијаат на продажбата, но ова е и добар пример за да можеме да ја согледаме разликата помеѓу памтењето и потсетувањето (сеќавањето).

***

На крај ќе изнесам еден многу едноставен метод за брзо влегување во медитативна состојба која најмногу можеме да ја користиме за потсетување на нешто што сме заборавиле. Така на пример ако треба да се сретнеме со некој човек со кого сме се запознале пред неколку дена но сме го заборавиле неговото име, потребно ни е подолго време за да навлеземе во медитативна состојба, да го визуелизираме и „оживееме“ окружувањето на случката (случка бил моментот кога прв пат сме го слушнале името), и поново да го слушнеме името (да се подсетиме).

Но постои поедноставен и многу брз метод кој моментално ќе не доведе на Ниво на Умот на кое полесно можеме да се сетиме на некои информации. За таа цел ги спојуваме палецот, показалецот и средниот прст на едната рака, и нашиот ум моментално се префрла на пониски вибрации. Ако тоа го направиме одма, чувствуваме некоја мала промена која делува смирувачки на умот, но не е доволна за да го практикуваме овој метод. За потполна функционалност треба да влеземе во медитативна состојба и да си речеме (во себе или полугласно):  - Кога вака ќе ги спојам прстите (сега ги спојуваме) со одредена цел, моментално ќе го достигнам ова ново на умот за да ја постигнам целта.  Со ова упатуваме сугестија до умот, а зборовите може и да се прилагодат на нашиот стил на изразување. Оваа вежба треба да се повторува секој ден во текот на една недела, но притоа треба да ги употребуваме истите зборови. Со ова во нашиот ум ќе создадеме цврста врска помеѓу спојувањето на трите прсти и моментално постигнување на медитативна состојба. Сепак, за да ја постигнеме целта мораме да го визуелизираме и окружувањето на случката.

Петар Лука

Контрола на умот-2 (КРЕАТИВНА ВИЗУЕЛИЗАЦИЈА)

КРЕАТИВНА  ВИЗУЕЛИЗАЦИЈА

 Можеби ќе се запрашате зошто и посветувам толку голем простор на Визуелизацијата кога за неа пишував во предходниот пост, пишував порано кога ги изнесував основните спознанија за „Моќта на подсвеста’’ , и во други прилики при спознавање на духовната моќи на човекот - за  кои човекот најчесто не е свесен и несвесно негативно влијае врз свјот живот. Но иако сакам да бидам концизен и практичен, можеби некои работи ќе морам почесто да ги спомнувам и проширувам спознанијата за нив, бидејќи се основа за спознавање на духовните влијанија во секојдневниот живот. Притоа ќе ги избегнувам длабоките анализи за духовниот свет бидејќи тоа е работа на луѓето кои целиот свој живот го посветиле на духовноста.

   

               Како што видовме, Визуелизацијата претставува создавање на ментална слика на она на што сме се сконцентрирале, односно на она што го посакуваме и очекуваме да се реализира. Ако со визуелизација создаваме ментална претстава на некој предмет, ние се концентрираме на предметот за да создадеме што појасно слика, а со тоа ја вежбаме и нашата концентрација и меморија. Но да не заборавиме дека за успешна реализација потребни се верување, желба и очекување.

        Секој човек природно поседува имагинација која постојано ја применува во секојдневниот живот. Имагинацијата е способност да создадеме идеја или ментална слика во нашиот Ум. Таа е наша природна способност и основна креативна енергија на Универзумот која постојано ја користиме, свесно или несвесно.  Ако свесно ја користиме, свесно ќе создаваме ментални слики на она што го посакуваме и очекуваме да ни се оствари во животот - а тоа е креативна визуелизација.

       При креативната визуелизација продолжуваме редовно да се концентрираме на идејата или сликата, за да и ја дадеме потребната енергија за реализација на тоа што сме замислиле (визуелизирале).    Но многу често човекот несвесно ја користи својата имагинација, и поради животните потешкотии, проблеми и мани кои ги посеува, создава негативна слика за себе, заклучувајќи  дека сето тоа нему судбински му е предодредено (без да биде свесен дека делумно сам си ги предизвикал сопствените потешкотии). Со свесна примена на креативната визуелизација, го добиваме клучот на успехот за реализација на нашите желби и богатството на животот.

Се’ што ни се случува во животот, всушност претставува остварување на нашите ментални слики кои можат да бидат позитивни или негативни (бидејќи најчесто се несвесни). Ако сме свесни за силата на имагинацијата, тогаш целта на нашите ментални слики може да биде од било кое ниво: Физичко, Емоционално, Ментално или Духовно (нова куќа или стан, добро работно место, складен однос и хармонија со колегите на работа или членовите на нашето семејство, душевно спокојство, подобрено памтење или способност за учење, материјална ситуираност, лесно решавање на тешки ситуации, исполнетост со љубов и духовно задоволство, и сл.).

          Креативната визуелизација е одраз на нашето разбирање и ускладување со природните законитости и принципи кои управуваат со универзумот, и учење на методите за користење на тие принципи на свесен и креативен начин. Многу работи кои во секојдневниот живот ни се вообичаени и природни (пример еден прекрасен цвет, залезот на сонцето и сл.) се перцепирани со нашите сетила, но ако некој ни ги опишеше пред да ги видиме или доживееме, тие за нас ќе беа „чудо’’. Истото важи и за Процесот на Креативна Визуелизација – она што во почетокот ни изгледа несватливо или неможно за нашиот рационален ум, ќе постане сосем разбирливо кога ќе го осознаеме и оствариме, правејќи „чуда“ со нашиот живот. Но мораме да напомнеме дека оваа техника не можеме да ја користиме за контрла на однесувањето на другите, ниту да ги присилиме да направат нешто против нивната воља. Нејзиниот ефект е во отстранувањето на нашите внатрешни препреки кон природна хармонија и самосвест, а тоа и индирекно ќе ги покрене процесите да и другите почнат да се изразуваат на најпозитивен начин (што правиш, тоа и ќе си најдеш). Овде нема да посочувам конкретни методи кои за неупатените можат да бидат нереални, но самата свесност, верување, желба и очекување,  ќе бидат патоказ за испробување, развивање и применување  на методи кои ќе внесат свесни позитивни промени во нашиот живот.

     За да ја зголемиме нашата свесност на духовен план, односно за да го разбереме начинот на делување на креативната визуелизација, потребно е да се запознаме со неколку принципи кои меѓусебно се поврзани:

     

     1. Нашиот физички универзум е Енергија односно материјата и енергијата се две појавни форми на иста стварност (во зависност од фреквенцијата на вибрација). За нашите сетила, предметите изгледаат цврсти и одвоени еден од друг, но на атомско и суб-атомско ниво цврстата материја е составена од се’ помали честички и честички во тие честички – за кои на крај се испоставува дека се чиста енергија. Физички, ние сме само енергија и дел од едно големо енергетско поле во кое енергијата вибрира со различни степени на брзина (фреквенции), а тоа е причина за различен квалитет – од пофина до густа форма на енергија. Мислата е пофина форма на енергија и затоа многу бргу и лесно се менува. Материјата е релативно густа и компактна форма на енергија, и затоа поспоро се движи и менува во зависност од нејзината густина. Сепак сите форми на енергија меѓусебно се зависни и можат да делуваат една врз друга.

    2. Енергиите со сличен квалитет или вибрации се привлекуваат.

 Еден од законите за енергијата гласи: „Енергијата со одреден квалитет или вибрации ја привлекува енергијата со сличен квалитет или вибрации’’.   Мислите и чувствата имаат имаат сопствени фреквенции и привлекуваат енергии со слична природа или фреквенции (Затоа внимавајте што мислите и какви чувства подржувате!)

   3. Мислата или идејата секогаш е предходник на реализацијата.

Бидејќи мислата е брза и мобилна форма на енергија, таа настанува моментално, а материјата е погуста форма на енергија и потребно е време за нејзина реализација. Кога нешто создаваме, најпрво ја создаваме формата на мислата а потоа го реализираме она што сме го помислиле. Пред подготвувањето на некое јадење - најпрво се јавува идеја за да се направи тоа јадење, пред да се излезе нешто да се купи - најпрво се јавува желба да се купи тоа што ни е потребно. Мислата или идејата е основниот план кој создава форми на енергија која се реализира на физички план. Но не’ секогаш преземаме физички активности за да се реализира нашата мисла. Идејата или мислата која ја задржуваме во себе е енергија која ќе покуша да привлече и создаде форма на физичка основа (пр. ако стално мислиме дека ќе се разболиме, ние навистина ќе се разболиме).

   4. Закон за зрачење и привлекување.

Во животот секогаш најповеќе го привлекуваме она за кое најмногу размислуваме, најјасно го замислуваме, во кое што најмногу веруваме и очекуваме. Кога сме негативно расположени, кога се плашиме од нешто, кога некого сакаме да го избегнеме, кога сме загрижени – ќе привлечеме токму такви искуства, ситуации, или луѓе. Ако сме позитивно расположени, ќе привлекуваме ситуации или случувања кои одговараат на нашите позитивни очекувања – што повеќе зрачиме позитивна енергија, толку повеќе позитивна енергија ќе добиваме. Овде дословно важи поговорката „Што си сеел, тоа и ќе жнееш’’.

ПРИМЕНА НА КРЕАТИВНАТА ВИЗУЕЛИЗАЦИЈА

       Ние веќе се запознавме со суштината и целта на креативната визуелизација, но за практична примена во некои случаи е потребно најпрво да се ослободиме од некои наши ставови према животот, негативни концепти и стравувања кои не кочеле и ни оневозможувале да го постигнеме задоволството и содржината на животот која сме ја очекувале. Тоа бара длабока анализа, откривање и спознавање, а потоа и отстранување на овие лимитирачки ставови преку процесот на креативна визуелизација или медитација.

      Најпрво Креативната визуелизација треба да се вежба во одредено време со одредена цел, а покасно таа постанува интегрален дел на нашето размислување – трајна свест при која сме свесни дека сме креатор на сопствениот живот.

      Овде ќе изнесам една едноставна вежба за креативна визуелизација. Најпрво е потребно добро да се опуштиме во лежечка или седечка положба. Начинот на опуштање може да биде индивидуален или можеме да користиме и некоја медитативна техника (што не е задолжително). При опуштањето препорачливо е длабоко и споро дишење, со броење од 10 до 1. Кога ќе почуствуваме потполна релаксација, почнуваме да го замислуваме тоа што го сакаме – некој предмет кој сакаме да го имаме, случка во која би уживале, ситуација во која би сакале да се најдеме или барање за подобрување на некои односи или животни услови.  За почеток, добро е ако тоа биде нешто поедноставно кое можеме најлесно да го замислиме како го добиваме. Ако е тоа некој предмет, треба да замислиме како веќе да го поседуваме и се радуваме што го имаме. Ако е тоа ситуација или случка, замислуваме како да сме на лице место и се ни се случува онака како што сме сакале. Притоа уживајте во тоа што сте го добиле или постигнале – како да е тоа реалност (чувство која ни се случува во нашите сонови). Потоа, задржувајќи ја идеата или сликата во мислите, треба да се рече (најчесто во себе) нешто многу позитивно и афирмативно (пр. уживам кога сум во природа, или: - одлично се чувствувам на излет покрај река, или: -радосен сум кога сум со мојата девојка, или: - јас стварно имам добри пријатели, и сл.). Ваквите позитивни изјави се нарекуваат „афирмации’’ и секогаш треба да претставуваат нешто што е реализирано и кое ни оставило пријатни впечатоци (никако не смеат да бидат желби, туку треба да се афирмации). На крај од визуелизацијата самите себе си изјавуваме дека ова или нешто подобро се манифестира за мене, со ова се радуваат и моите најблиски, и сл (како тоа да е веќе реализирано).

    Ако при визуелизацијата се јават сомневања или контрадикторни мисли, не треба да им се спротиставуваме или да даваме отпор (за да не добијат на снага која ја немаат), туку треба да им дозволиме да поминат низ нашата свест, и поново да се вратиме на позитивните слики и изјави. Визуелизацијата трае се додека пријатно се чувствуваме (најчесто од 5 до 30 мин.), но треба почесто да се повторува.

 ***

За успешна и креативна визуелизација многу е важно добро да се опуштиме бидејќи кога телото и умот се длабоко опуштени се намалува фревенцијата на брановите на мозокот и влегуваме во тн. Алфа Ниво на свеста (8-12 Hz). При ова ниво  имаме отворен пристап до подсвеста и се активираат истовремено двете хемисвери на мозокот. За моќта на подсвеста веќе зборувавме во два поста од овој блог.

   Претходната вежба не не обврзува стрикно да се придржуваме до неа, туку ни дава насока за практична примена на креативната визуелизација. Ако сме успеале да развиеме друг начин на опуштање или пак на друг начин можеме да дојдеме до медитативна состојба (Алфа ниво на свеста), тогаш подобро е да ги користиме тие методи. Препорачливо е практикување на креативната визуелизација пред спиење или наутро одма по будењето бидејќи тогаш телото и умот се длабоко опуштени.

***

Визуелизацијата не значи дека секогаш треба да се има јасна ментална слика на тоа што го визуелизираме - понекогаш е доволно да „размислуваме’’ и да го почуствуваме реализирањето на нашата замисла бидејќи не е можно за се што визуелизираме да добиеме јасна ментална слика. Некогаш Верувањето, Желбата и Очекувањето се сосем доволни за реализација на нашите желби, поготово ако сме добро опуштени и навлезени во Алфа ниво на свеста (кога имаме отворен пристап до подсвеста).

    Петар Лука

КОНТРОЛА НА УМОТ-1

КОНТРОЛА НА УМОТ - 1

1.  МЕДИТАЦИЈА И ВИЗУЕЛИЗАЦИЈА

 Ние досега се запознавме со Повисоките форми на свест и развојот на свеста, со Моќта на подсвеста, Дрвото на животот кое е дијаграм на постоечките космички снаги (како во макрокосмосот, така и во микрокосмосот – човекот), со Материјата и Енергијата како две појавни форми на иста стварност, со Духовните повисоки светови и потребното ниво на свест за посета и престојување во овие светови, и многу други сознанија кои не се предмет на научните проучувања (науката е ориентирана кон материјалниот свет, со чесни исклучоци),  но се дел од нашата реалност во духовниот нематеријален свет сеприсутен во универзумот и подложен на универзални закони (од кои во најголем дел се непознати за човекот или погрешно се интерпретираат поради ограничувањата на материјално ниво).

          Затоа, редно е да се запознаеме и проучиме некои методи и техники кои ни овозможуваат брзо навлегување во тајните на нематеријалниот свет, и да објасниме некои поими кои моравме да ги употебиме при излагањето на овие теми (медитација, концентрација, визуелизација, иницијација, евокација и сл). Секако дека за ваквото излагање во најконцизна форма се потребни барем неколку постови, а после тоа ќе продолжиме со практична примена на Дрвото на животот, проширување на знаењата за темите за кои зборувавме, и запознавање со нови спознанија од духовниот свет.

      Моќта на контролата на умот врз телото, мислите, емоциите, концентрацијата, човековите активности, здравјето, решавањето на сложени проблеми и во многу други свери на човековите активности, е тесно поврзана со медитацијата, но и со визуелизацијата за која е потребно верување, желба и очекување.

          Медитацијата во секојдневниот говор значи „за нешто да се размислува’’, но во разните техники каде се применува има попрецизно значење кое се однесува на Нивото на Умот, ослободување на умот од секаква свесна мисла (што предизвикува пријатна смиреност и спречување на заболувања поради нервна напетост), но и состојба на Умот во која се визуелизира или се задаваат инструкции кои по излегувањето од тоа ниво на умот, имаат голема сугестивна моќ која понатаму сликовито ќе ја разгледаме. Контролата на умот значи да се навлегува во медитативно ниво каде Умот може да се вежба да го презема управувањето за постигнување на бескрајни можности на медијантот. Притоа, инструкциите дадени на Умот во медитативна состојба треба да бидат на негов својствен начин преку слики и зборови (или мисли). Целта на контролата на умот е да ја прошириме нашата свест и да се научиме да ја пробудиме латентната моќ на умот која била позната само на мал број природно надарени луѓе  и на мистици кои целосно се посветиле на ваквите моќи кои се надвор од спознанијата кои ги добиваме преку петте чула со кои сме родени (вкус, мирис, слух, вид и допир).

        Визуелизацијата претставува создавање на ментална слика на она на што сме се сконцентрирале во текот на медитацијата. Таа е основа за Контрола на Умот, иако се користи и во други медитативни техники. Ние веќе се запознавме со важноста на визуелизацијата при проучувањето на Моќта на подсвеста - каде што вербата, желбата, визуелизацијата (создавање на јасна ментална слика на она што го посакуваме) и очекувањето на реализацијата, се основни услови за делување на нашата подсвест. При процесот на медитација, визуелизацијата има иста улога како и кај  „Моќта на подсвеста’’,  но овде се применува во медитативна состојба на умот.    При  Контрола на умот (кај Силва метод), кога медитираме креираме Ментален екран за визуелизација, поставен на околу  два метра пред нас (како биоскопско платно), и на овој екран го проектираме се она на кое сакаме да се концентрираме. За почеток, креираме нешто добро познато и едноставно (пр. јаболко), но со текот на искуството, таквите ментални проекции стануваат се посложени и појасни. При секое влегување во медитативна состојба креираме само една слика со сите свои поединости (во трите димезии, со сите бои и други ситници за пореален изглед). Доколку во почетокот ни се јавуваат други мисли или слики, треба без напнатост и нервоза поново да се вратиме во медитативна состојба, да пробаме со поедноставен предмет за визуелизација и да ги повторуваме вежбите додека нашиот мозок не навикне.

Така, користејќи го својот Ум, го вежбаме мозокот да навлезе мирно во медитативна состојба и се посвети на креирање на што појасна слика на предметот на кој сме се концентрирале. Значи, правиме добар тренинг за концентрација (која ни е многу потребна за користење на моќта на умот), и при ова ниво на развој на медитацијата постигнуваме длабок душевен мир, спокојство, опуштеност,  и добро здравје. Но, тоа се скромни достигнувања во однос на можностите на Умот кога во ваква медитативна состојба го вежбаме за организирање на динамички активности со кои постигнуваме спектакуларни резултати во многу области на животот.

2. СОСТОЈБАТА НА УМОТ ЗА ПРИСТАП ДО ПОДСВЕСТА

Состојбата на умот за пристапување до подсвеста е тесно поврзана со фреквенцијата на брановите на мозокот. Веќе е научно докажано дека мозокот емитува електрични периодични импулси кои се електрични бранови со различни фреквенции (број на импулси во една секунда). Всушност преку електричните импулси се остварува комуникацијата помеѓу ќелиите на мозокот, a фреквенцијата на овие импулси може да се мери со електроенцефалограф (EEG). При различни состојби на Умот (медитативна, будна и активна, состојба на потполна концентрација и сл.) мозокот емитува електрични импулси со различни фреквенcии.

       За нас најбитни се Алфа брановите кои имаат фреквенција од околу 10 Hz (или поточно 8-12 Hz), и се јавуваат при состојба на опуштеност, медитација, сонување, пред заспивање и пред будење, при фантазирање и сл. Тоа е Алфа-ниво на свеста при кое имаме отворен пристап до подсвеста, можеме да ги менуваме нејзините програми, имаме силна интуиција, развиена креативна способност, подобро учиме и памтиме и сл.

        Кога сме во активна будна состојба, обично велиме дека сме на Бета ниво, брановите на мозокот имаат повисока фреквенција (13-40 Hz) и човекот обавува разни свесни активности кои се доминантни во текот на денот. Следното повисоко ниво се Гама брановите и се јавуваат при потполна концентрација и максимално користење на интелектуалните капацитети (40-70 Hz).

       Овде ќе спомнеме уште едно ниво кое е под Алфа нивото и во кое често се навлегува при подлабока медитација. Тоа е Тета нивото при кое Тета брановите имаат фреквенција од 4-7 Hz, постои длабока опуштеност но тешко се останува свесен на ова ниво.

 Алфа и Тета нивото се нивоа на медитација и подлабока медитација (при кои имаме отворен пристап до подсвеста), но ќе спомнеме уште едно ниво преку кое се остварува контакт со подсвеста, иако никој неможе свесно да пристапи до него. Тоа е ниво на кома и состојба на длабок сон, а брановите кај ова ниво имаат најниска фреквенција (1-4 Hz) и се наречени Делта бранови.

3. АЛФА НИВО НА СВЕСТА

     При Алфа ниво на свеста (кога нашиот мозок емитува електрични импулси со фреквенција од  8 до12 Hz, и кога имаме отворен пристап до подсвеста), се активираат истовремено двете хемисвери на мозокот, а нивниот избалансиран однос е клучот на успехот за откривање на тајната на контролата на умот. Во ваква состојба способни сме да ги менуваме програмите на подсвеста, да се фокусираме повеќе на себе отколку на надворешните влијанија, да добиваме креативни идеи, имаме силна интуиција, подобро учиме и памтиме, потполно сме опуштени на физички и ментален план, ни зајакнува имуниот систем и сл. Но ова е и нивото на кои можеме да решаваме различни проблеми со здравјето (кај себе и другите), враќање на памтењето кога нешто сме заборавиле и не сме можеле да се сетиме, како и многу други проблеми на кои можеби покасно ќе се навратиме и ќе ги разработиме.

      

Алфа ниво, или Алфа состојба на свеста  може да се постигне на многу начини, од кои некои овде ќе ги наброиме:

       1. Медитација  - Постојат различни методи на медитација, во зависност од целта.

       2. Само-хипноза - Овој метод е многу сличен на медитација со која сами себе се  доведуваме во состојба на само-хипноза при која надворешните влијанија се сведени на минимум и имаме поголеми можности да го насочиме умот да прави она што сакаме (ако хипнозата се примени  врз други, тие не се свесни за средината околу себе).

      3. Визуелизација – Најчесто се применува во комбинација со медитацијата,  но може да се применува и самостојно доколку имаме посилна инспирација. Со затворање на очите (да го намалиме ефектот на надворешните влијанија) и создавање на слика или претстава во нашите мисли, го зголемуваме бројот на Алфа брановите, а доколку јасно се сконцентрираме на замислената слика и ја изразиме со повеќе особености, тогаш можеме комплетно да преминеме во Алфа ниво на свеста.

     4. Јога – Јогата има разновидна намена и постојат многу различни врсти на Јоги, но најчесто доведува и до Алфа состојба на свеста.

     5. Длабоко дишење – Длабокото дишење и разните варијации со задржување на воздухот или мирување при испуштен воздух, доведуваат до пораст на универзалната енергија во човекот, состојба на опуштање, снижување на фреквенцијата на брановите на мозокот и Алфа ниво на свеста.

     6. Аудио-стимулација – При монотони (повторувачки) тонови нашиот мозок ја прифаќа фреквенцијата на тонот  а потоа ја успорува својата работа и постепено преминува на Алфа ниво (да се потсетиме на монотоните звучни тонови на барабаните при разни племенски ритуали).

      7. Во Алфа состојба на свеста можеме да се најдеме и при разни околности кои не се во врска со нашето свесно делување за навлегување во ова ниво со одредена цел. Овде ќе ги спомнеме состојбите пред заспивање (дремливост), одма после будење (нерасонети), при гледање на телевизија, пијанство, пушење марихуана и сл.

***

    Умот поседува огромни можности кои на нормалното ниво на функционирање не можат да дојдат до израз поради големиот број на надворешни влијанија во исто време: разни мисли во различни ситуации, разни секојдневни обврски, задоволување на потребите или желбите, тежнеења кон остварување на разни цели, разни проблеми, несогласувања и расправии, сите врсти на стресови, притисоци, разни дразби на сетилата и сл. Поради тоа најчесто користиме околу 5 до 10% од можностите. А кога надворешните дразби се намалат и телото и умот се опуштат (пр. дремливост пред спиење), тогаш можностите на умот се зголемуваат но - треба да научиме како да ја користиме таквата состојба.

    Менталните вежби не подучуваат како да го опуштиме умот и телото, но истовремено и како да функционираме ментално кога сме на релаксирачко ниво. Кога човекот ќе научи ментално да функционира на подлабоки нивоа на опуштеност на умот и телото, се зголемува креативноста и памтењето, и се доаѓа до најоптимални решенија при разни сложени проблеми. При подолготрајни ментални вежби се променува и начинот на размислувањето во секојдневниот живот бидејќи моментално може да се пристапи до своето „ниво’’ и се искористат повисоките можности на умот.

Петар Лука